Sco exempel significativ per la debatta e per la tenuta da basa dal cussegl grond duai vegnir preschentà qua il votum d'in commember dal cussegl grond (PCG 4 I 2001/2002, p. 456):
 
Il WEF ha ina forza tut speziala. Igl è in'occurrenza internaziunala, dentant betg in'organisaziun internaziunala. Il WEF na prenda naginas decisiuns. El na sto prender naginas decisiuns. Durant questa occurrenza vegnan dentant tgirads contacts ed igl ha lieu in dialog tranter la politica, l'economia ed autras gruppas d'interess.
 
Il WEF è er unic perquai che la preschientscha da la politica e da la societad civila sa mova sin in nivel fitg aut. Al WEF vegnan savens iniziads e discutads temas, e quai ditg avant che las medias sa fatschentan da quels. Il WEF porscha a noss chantun ina plattafurma excellenta per sa profilar, per construir punts e per arver novas perspectivas.
 
Il WEF fructifitgescha directamain il turissem a Tavau ed enturn Tavau ed ha ultra da quai contribuì essenzialmain a dar in maletg excellent al Grischun. E perquai vulain nus puspè survegnir enavos il WEF da New York l'onn 2003.
 
I dat dentant er blers e buns motivs per metter en dubi, per crititgar u schizunt per cumbatter la globalisaziun nuninterrutta. Per questa tenuta hai jau plaina chapientscha.
 
Per mai datti dentant anc ina ponderaziun che ma para impurtanta. Noss pajais vegn considerà sco emprim exempel da la libra democrazia. Sch'i dat insumma anc in sectur, en il qual nus cartain d'esser propi megliers che tut ils auters, dastgass quei esser il sectur da la democrazia directa. Tar questa democrazia tutga natiralmain er la libertad d'exprimer l'opiniun.
 
Cun raschun essan nus loschs da questa democrazia e nus exprimin er adina puspè, quant impurtanta che questa democrazia n'è betg mo per noss pajais, mabain cunzunt per mintgin da nus. E gist qua è bain ina crux essenziala cun il WEF. I sa chapescha da sez che nus vulain conceder noss dretgs democratics a domaduas gruppaziuns, tant a las globalisaturas ed als globalisaturs sco er a las antiglobalisaturas ed als antiglobalisaturs. Il WEF sa raduna gia dapi 30 onns nundisturbadamain a Tavau. Natiralmain duain er persunas cun in'autra opiniun dastgar sa radunar ed exprimer questa opiniun. Cunquai che democrazia na vul betg dir ch'ins sappia simplamain far quai ch'ins vul, vegn pretendì da domaduas gruppaziuns ch'ellas observian tschertas reglas da gieu fixadas. E questas reglas da gieu duessan esser enconuschentas bain avunda a tuts.
 
Sch'ina u sche singulas gruppaziuns n'observan dentant betg questas reglas da gieu democraticas, èsi nossa obligaziun e noss duair visavi questa democrazia, da procurar cun las mesiras correspundentas necessarias che las reglas da gieu fixadas vegnian observadas. Sche nus na faschain numnadamain betg quai, perdain nus il status d'ina democrazia. Nus vegnin nunvardaivels e nossa democrazia daventa ina farsa.
 
Democrazia na vul betg mo dir che libertads vegnan concedidas, mabain che quellas vegnan er fatgas valair. Sche nus desistin da far valair questas libertads, po noss stadi vegnir mess sut squitsch e daventa baud u tard inabels d'agir. Pertge gist uschia sco ch'il WEF vegn cumbattì cun smanatschar caos e violenza, pon autras occurrenzas u instituziuns da noss chantun u da noss pajais vegnir cumbattidas.